वेकोली च्या ब्लस्टिंग ने गावकरी त्रस्त… वेकोली मस्त…

राजुरा : वेकोलीत कोळसा उत्खननासाठी घडवून आणत असलेल्या शक्तिशाली ब्लास्टींगने वेकोली परिसरातील अनेक घरांना तडे गेल्याने चांगल्या बांधलेल्या घरांचे अस्तित्वच धोक्यात आले आहे.यासंदर्भात वेकोलिकडे गावकर्‍यांनी अनेकदा तक्रारी केल्या. परंतु शक्तिशाली ब्लास्टिंगवर वेकोलीने अजूनपर्यंत कोणतीही उपाययोजना केली नाही.त्यामुळे गेल्या ३५ वर्षांपासून वेकोली परिसरातील गावकर्‍यांचे आयुष्यच हादरले आहे. बल्लारपूर क्षेत्रांतर्गत येणार्‍या वेकोलीच्या राजुरा तालुक्यात मोठ्या प्रमाणात भूमिगत व खुल्या कोळसा खाणी आहे. सास्ती, धोपटाळा, गोवरी, पोवनी, गोयेगाव, अंतरगाव, साखरी, चिंचोली, हिरापूर परिसरात वेकोलीच्या कोळसा खाणींचे जाळे विणले आहे.या परिसरात दगडी कोळशाचे साठे मोठ्या प्रमाणात असल्याने वेकोलीने या परिसरात ३५ वर्षापूर्वी कोळसा खाणींचे निर्माण केले. मात्र कोळसा खाणीतील कोळसा कमी होताच वेकोलीने वाढीव कोळसा खानीसाठी जमिनी अधिग्रहित करून सास्ती, धोपटाळा, गोवरी, पोवणी, गोयेगाव, अंतरगाव, चिंचोली, साखरी, हिरापूर परिसरात नव्या कोळसा खाणींचे जाळे तयार केले असून नागरिकांसाठी डोकेदुखी झाली आहे.

Like Our Facebook Page